I te tau i ma'iri, o Tetua'airoro e raatira o to tatou nei mata'einaa. Tana vahine, o Ahuura ia. Vahine purotu e te nehenehe mau.

I te ho'e mahana, tô mai nei o Ahuura.

Ua faa'oti o Tetua'airoro, ia fanau o Ahuura i ni'a i te mou'a teitei roa a'e no Mataiea, oia ho'i o Tera'iamano.

Tae raa i tera mahana, haere atu ra o Ahuura e tana mau tavini vahine i ni'a i te mou'a no Tera'iamano

Toru mahana i muri iho, fanau mai nei o Ahuura.

Tera ra, e ere i te ho'e aiu, e puhi tari'a ra.

No tona ri'ari'a i te ite raa tu i teie puhi, tufera atura o Ahuura i muri. Piihia atura te mou'a o Tetufera.

Ua vehi hia teie nei mou'a i te ho'e remu 'ute'ute, te remu 'ura. Tapa'o te reira e, ua tupu mau a i te ho'e faafanauraa i ni'a i te mou'a no Tetufera.

Hee mai nei teie puhi mai ni'a mai te mou'a, e tae roa atu i roto i te roto no  Vaihiria : o Faaravaianuu tona i'oa.

Faaravaianuu, te maimoa o Ahuura
Faaravaianuu, te arii no Vaihiria
Faaravaianuu, te ‘aito nui no Mataiea

Si cette légende vous a plu, vous pouvez la télécharger en version vidéo en cliquant ici.